ಮಂಗಳೂರು: ಮುಂಜಾನೆಯ ಮಂಗಳೂರು ಎಂದಿನಂತೆ ವಾಕಿಂಗ್, ಓಟದಲ್ಲಿ ತೊಡಗಿದ್ದ ನಗರದ ರಸ್ತೆಗಳು ಭಾನುವಾರ ಮಾತ್ರ ವಿಭಿನ್ನ ದೃಶ್ಯಕ್ಕೆ ಸಾಕ್ಷಿಯಾದವು. ಬಣ್ಣಬಣ್ಣದ ಸೀರೆ ತೊಟ್ಟ ನೂರಾರು ಮಹಿಳೆಯರು ಒಂದೇ ಉತ್ಸಾಹದಲ್ಲಿ ಹೆಜ್ಜೆ ಹಾಕಿದರು. ಕೆಲವರು ಓಡಿದರು, ಕೆಲವರು ನಡೆದರು. ಇನ್ನೂ ಕೆಲವರು ನಗು, ಸಂಭ್ರಮದೊಂದಿಗೆ ಹೆಜ್ಜೆ ಹಾಕುತ್ತಾ ಆರೋಗ್ಯದ ಸಂದೇಶದ ಜತೆಗೆ ಸೀರೆಯ ಸೊಬಗನ್ನೂ ಸಾರಿದರು.
ಇದು ನಗರದ ನಾರಿ ಕ್ಲಬ್ ವತಿಯಿಂದ ಆಯೋಜಿಸಿದ್ದ 6ನೇ ಆವೃತ್ತಿಯ ‘ಸಾರಿ ನಡಿಗೆ ಮತ್ತು ಓಟ’ಕಾರ್ಯಕ್ರಮದ ದೃಶ್ಯ. ಸಾಂಪ್ರದಾಯಿಕ ಉಡುಗೆಯಾದ ಸೀರೆಯಲ್ಲೇ ಮಹಿಳೆಯರು 3 ಕಿ.ಮೀ. ಓಟ–ನಡಿಗೆಯಲ್ಲಿ ಪಾಲ್ಗೊಂಡು ಆರೋಗ್ಯ ಜಾಗೃತಿಗೆ ವಿಭಿನ್ನ ಸ್ಪರ್ಶ ನೀಡಿದರು.
ಸೀರೆಯಲ್ಲೇ ಓಟ, ನಡಿಗೆ
ಮಹಿಳೆಯರಲ್ಲಿ ದೈಹಿಕ ಕ್ಷಮತೆ ಹಾಗೂ ಆರೋಗ್ಯದ ಬಗ್ಗೆ ಜಾಗೃತಿ ಮೂಡಿಸುವುದರ ಜತೆಗೆ ಸಾಂಪ್ರದಾಯಿಕ ಉಡುಗೆಯನ್ನು ಪ್ರೋತ್ಸಾಹಿಸುವ ಉದ್ದೇಶದಿಂದ ಕಾರ್ಯಕ್ರಮ ಆಯೋಜಿಸಲಾಗಿತ್ತು. 18 ವರ್ಷದಿಂದ 80 ವರ್ಷದವರೆಗಿನ ಮಹಿಳೆಯರು ಒಂದೇ ವೇದಿಕೆಯಲ್ಲಿ ಸೇರಿದ್ದು ಕಾರ್ಯಕ್ರಮದ ವಿಶೇಷತೆಯಾಗಿತ್ತು.
ಸುಮಾರು 600 ಮಹಿಳೆಯರು ಸೀರೆಯಲ್ಲೇ ಓಟ–ನಡಿಗೆಯಲ್ಲಿ ಭಾಗವಹಿಸಿದರು. ವಯಸ್ಸಿನ ಅಂತರವನ್ನೂ ಮರೆತು ಮಹಿಳೆಯರು ಉತ್ಸಾಹದಿಂದ ಹೆಜ್ಜೆ ಹಾಕಿದ್ದು, ಕಾರ್ಯಕ್ರಮಕ್ಕೆ ಮತ್ತಷ್ಟು ಮೆರುಗು ತಂದಿತು.
ಜುಂಬಾ, ಸೆಲ್ಫಿ; ಸಂಭ್ರಮದ ವಾತಾವರಣ
ಬೆಳಿಗ್ಗೆಯಿಂದಲೇ ಗೋಕರ್ಣನಾಥೇಶ್ವರ ಕಾಲೇಜು ಆವರಣಕ್ಕೆ ಮಹಿಳೆಯರು ಆಗಮಿಸಲಾರಂಭಿಸಿದ್ದರು. ಕಾರ್ಯಕ್ರಮ ಆರಂಭಕ್ಕೂ ಮುನ್ನ ಜುಂಬಾ ನೃತ್ಯಕ್ಕೆ ಹೆಜ್ಜೆ ಹಾಕಿದ ಮಹಿಳೆಯರು, ಪರಸ್ಪರ ಪರಿಚಯ ಮಾಡಿಕೊಂಡು, ಸೆಲ್ಫಿ ತೆಗೆದುಕೊಂಡು ಸಂಭ್ರಮಿಸಿದರು.ಆರೋಗ್ಯದ ಜತೆಗೆ ಸಂತಸ, ಸ್ನೇಹ ಮತ್ತು ಸಾಮಾಜಿಕ ಒಡನಾಟಕ್ಕೂ ಕಾರ್ಯಕ್ರಮ ವೇದಿಕೆಯಾಯಿತು.
3 ಕಿ.ಮೀ. ಸಾಗಿ ಬಂದ ಮಹಿಳೆಯರ ಸಾಲು
ಬೆಳಿಗ್ಗೆ 6.30ಕ್ಕೆ ಗೋಕರ್ಣನಾಥೇಶ್ವರ ಕಾಲೇಜು ಆವರಣದಿಂದ 3 ಕಿ.ಮೀ. ಓಟ–ನಡಿಗೆಗೆ ಚಾಲನೆ ದೊರೆಯಿತು. ಸಂಚಾರ ವಿಭಾಗದ ಎಸಿಪಿ ನಜ್ಮಾ ಫಾರೂಕಿ ಅವರು ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.
ಮಹಿಳೆಯರ ಓಟಕ್ಕೆ ಮುನ್ನ ಇಬ್ಬರು ಮಹಿಳೆಯರು ಬುಲೆಟ್‌ನಲ್ಲಿ ಸಾಗಿದರು. ಬಳಿಕ ಸೀರೆಯಲ್ಲಿದ್ದ ಮಹಿಳೆಯರ ಸಾಲು ಉತ್ಸಾಹದಿಂದ ಓಟ ಆರಂಭಿಸಿತು. ಮಣ್ಣುಗುಡ್ಡ, ಗುರ್ಜಿ, ಲೇಡಿಹಿಲ್ ಹಾಗೂ ಮಾರಿಯಮ್ಮ ವೃತ್ತದ ಮೂಲಕ ಸಾಗಿದ ಓಟ–ನಡಿಗೆ ಮತ್ತೆ ಗೋಕರ್ಣನಾಥೇಶ್ವರ ಕಾಲೇಜು ಆವರಣದಲ್ಲಿ ಅಂತ್ಯಗೊಂಡಿತು.
ಕರ್ನಾಟಕ ಪರಿಸರ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿಯ ಅಧ್ಯಕ್ಷೆ ಶಾಲೆಟ್ ಪಿಂಟೋ, ಕಾರ್ಯಕ್ರಮದ ಆಯೋಜಕ ರಾಜೇಶ್ ರಾಮಯ್ಯ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
ಸಾಂಪ್ರದಾಯಿಕ ಉಡುಗೆಯಲ್ಲಿ ಆರೋಗ್ಯದ ಸಂದೇಶ
ಇಂದಿನ ವೇಗದ ಜೀವನಶೈಲಿಯಲ್ಲಿ ದೈಹಿಕ ಚಟುವಟಿಕೆಗಳಿಗೆ ಹೆಚ್ಚಿನ ಆದ್ಯತೆ ನೀಡಬೇಕಾದ ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ಮಹಿಳೆಯರನ್ನು ನಿಯಮಿತ ವ್ಯಾಯಾಮ ಮತ್ತು ಆರೋಗ್ಯಕರ ಜೀವನಶೈಲಿಯತ್ತ ಪ್ರೇರೇಪಿಸುವ ಉದ್ದೇಶ ಕಾರ್ಯಕ್ರಮದ ಹಿಂದಿತ್ತು.
ಸೀರೆ ಕೇವಲ ಸಾಂಪ್ರದಾಯಿಕ ಉಡುಗೆಯಾಗಿರದೆ, ಅದೇ ಉಡುಗೆಯಲ್ಲಿ ಓಟ–ನಡಿಗೆಯಂತಹ ದೈಹಿಕ ಚಟುವಟಿಕೆಗಳಲ್ಲೂ ಪಾಲ್ಗೊಳ್ಳಬಹುದು ಎಂಬ ಸಂದೇಶವನ್ನು ಮಹಿಳೆಯರು ತಮ್ಮ ಪಾಲ್ಗೊಳ್ಳುವಿಕೆಯ ಮೂಲಕ ಸಾರಿದರು.
ಹಲವು ಸಂಘಟನೆಗಳ ಸಹಕಾರ
ನಾರಿ ಕ್ಲಬ್, ಮೈಸೂರು ಸಿಲ್ಕ್ ಕಾರ್ಪೊರೇಷನ್, ಫ್ರೀಡಂ ಆಯಿಲ್, ಮೈಸೂರು ಸ್ಯಾಂಡಲ್, ಜಯಲಕ್ಷ್ಮಿ ಬಿಜೈ, ಕೆನರಾ ಬ್ಯಾಂಕ್, ಆಭರಣ ಜ್ಯುವೆಲರ್ಸ್, ಎ.ಜೆ. ಆಸ್ಪತ್ರೆ ಹಾಗೂ ಇನ್ನರ್ ವ್ಹೀಲ್ ಕ್ಲಬ್ ಮಂಗಳೂರು ನಾರ್ತ್ ಮತ್ತು ಸುರತ್ಕಲ್ ಸೇರಿದಂತೆ ವಿವಿಧ ಸಂಘಟನೆಗಳು ಕಾರ್ಯಕ್ರಮಕ್ಕೆ ಸಹಕಾರ ನೀಡಿದ್ದವು.
ಸ್ಪರ್ಧಾತ್ಮಕವಾಗಿ ಭಾಗವಹಿಸಿದವರಿಗೆ ಪ್ರಥಮ, ದ್ವಿತೀಯ ಹಾಗೂ ತೃತೀಯ ಬಹುಮಾನಗಳನ್ನು ನೀಡಲಾಯಿತು. ಓಟ–ನಡಿಗೆಯಲ್ಲಿ ಪಾಲ್ಗೊಂಡ ಎಲ್ಲ ಮಹಿಳೆಯರಿಗೂ ಪ್ರಮಾಣಪತ್ರ ವಿತರಿಸಲಾಯಿತು. ಉಪಾಹಾರ ಹಾಗೂ ಸಸಿಗಳನ್ನು ವಿತರಿಸಲಾಯಿತು.
ಮಂಗಳೂರಿನ ಮುಂಜಾನೆಯ ರಸ್ತೆಯಲ್ಲಿ ಸೀರೆಯ ಬಣ್ಣಗಳ ನಡುವೆ ಮೂಡಿದ ಈ ಓಟ ಕೇವಲ ಒಂದು ಕಾರ್ಯಕ್ರಮವಾಗಿರಲಿಲ್ಲ. ಆರೋಗ್ಯದ ಕಾಳಜಿ, ದೈಹಿಕ ಕ್ಷಮತೆ, ಮಹಿಳಾ ಉತ್ಸಾಹ ಹಾಗೂ ಸಾಂಪ್ರದಾಯಿಕ ಉಡುಗೆಯ ಮೇಲಿನ ಅಭಿಮಾನ—ಈ ಎಲ್ಲವನ್ನೂ ಒಂದೇ ಹೆಜ್ಜೆಯಲ್ಲಿ ಕಟ್ಟಿಕೊಟ್ಟ ವಿಶೇಷ ಚಿತ್ರಣವಾಗಿತ್ತು.
What do you feel about this post?
Like
Love
Happy
Haha
Sad
