ಬೆಂಗಳೂರು: ಕರ್ನಾಟಕದ ಕಿರುತೆರೆಯ ಅತ್ಯಂತ ಜನಪ್ರಿಯ ರಿಯಾಲಿಟಿ ಶೋ ‘ಬಿಗ್‌ ಬಾಸ್‌ ಕನ್ನಡ’ದ 13ನೇ ಆವೃತ್ತಿಗೆ ಕ್ಷಣಗಣನೆ ಆರಂಭವಾಗಿದೆ. ಭಾನುವಾರ ಸಂಜೆ 7 ಗಂಟೆಗೆ ಅದ್ದೂರಿ ಪ್ರೀಮಿಯರ್‌ ಕಾರ್ಯಕ್ರಮ ನಡೆಯಲಿದ್ದು, ಕಿಚ್ಚ ಸುದೀಪ್‌ ಅವರು ‘ದೊಡ್ಮನೆ’ ಫ್ಲೈಟ್‌ನ ಕ್ಯಾಪ್ಟನ್‌ ಆಗಿ ಸ್ಪರ್ಧಿಗಳನ್ನು ಬರಮಾಡಿಕೊಳ್ಳಲಿದ್ದಾರೆ.

ಈ ಬಾರಿ ಬಿಗ್‌ ಬಾಸ್‌ ಕನ್ನಡ–13 ಹಲವು ವಿಶೇಷತೆಗಳನ್ನು ಒಳಗೊಂಡಿದೆ. ಪ್ರಮುಖವಾಗಿ, ಜನಪ್ರಿಯ ನಟ-ನಟಿಯರು, ಕಿರುತೆರೆ ಕಲಾವಿದರ ಜತೆಗೆ ಸಾಮಾನ್ಯರಿಗೂ ಸ್ಪರ್ಧಿಗಳಾಗಿ ದೊಡ್ಮನೆ ಪ್ರವೇಶಿಸುವ ಅವಕಾಶ ನೀಡಲಾಗಿದೆ.

ಈಗಾಗಲೇ ವಾಹಿನಿ ಇಬ್ಬರು ಸ್ಪರ್ಧಿಗಳ ಪ್ರೋಮೋಗಳನ್ನು ಬಿಡುಗಡೆ ಮಾಡಿದ್ದು, ಸಂಗೀತಾ ಭಟ್‌ ಅವರು ಆರನೇ ಸ್ಪರ್ಧಿಯಾಗಿ ಹಾಗೂ ಕಿರುತೆರೆ ನಟಿ ಕಾವ್ಯ ಗೌಡ ಅವರು ಏಳನೇ ಸ್ಪರ್ಧಿಯಾಗಿ ಮನೆ ಪ್ರವೇಶಿಸಲಿದ್ದಾರೆ ಎಂಬುದು ಖಚಿತವಾಗಿದೆ.

ಇದರ ನಡುವೆ ಉಳಿದ ಸ್ಪರ್ಧಿಗಳ ಕುರಿತಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ಹೆಸರುಗಳು ಹರಿದಾಡುತ್ತಿವೆ. ಈ ಪೈಕಿ ಬಹುತೇಕ ಹೆಸರುಗಳು ದೊಡ್ಮನೆ ಪ್ರವೇಶಿಸುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.

ಯಾರೆಲ್ಲ ಸ್ಪರ್ಧಿಗಳ ಪಟ್ಟಿಯಲ್ಲಿ?

ಆಸಿಯಾ ಫಿರ್ದೋಸ್‌: ‘ಕನ್ಯಾ ಕುಮಾರಿ’ ಹಾಗೂ ‘ಶ್ರಾವಣಿ ಸುಬ್ರಮಣ್ಯ’ ಧಾರಾವಾಹಿಗಳ ಮೂಲಕ ಜನಪ್ರಿಯತೆ ಗಳಿಸಿರುವ ಆಸಿಯಾ ಫಿರ್ದೋಸ್‌ ಹೆಸರು ಪ್ರಮುಖವಾಗಿ ಕೇಳಿಬರುತ್ತಿದೆ.

ವೈಷ್ಣವಿ ವಿ. ಕೌಂಡಿನ್ಯ:‘ಮಿಥುನ ರಾಶಿ’ ಧಾರಾವಾಹಿ ಮೂಲಕ ಗಮನ ಸೆಳೆದ ಅವರು, ಬಳಿಕ ‘ಪ್ರೇಮ ಕಾವ್ಯ’ದಲ್ಲಿ ‘ಕಾವ್ಯ’ ಪಾತ್ರದ ಮೂಲಕ ಮನೆಮಾತಾಗಿದ್ದಾರೆ.

ಎನ್. ಓಂ ಪ್ರಕಾಶ್‌ ರಾವ್:ನೇರ ಮಾತು ಹಾಗೂ ವಿಭಿನ್ನ ವ್ಯಕ್ತಿತ್ವದಿಂದ ಗುರುತಿಸಿಕೊಂಡಿರುವ ನಿರ್ದೇಶಕ ಓಂ ಪ್ರಕಾಶ್‌ ರಾವ್‌ ಮತ್ತೆ ಬಿಗ್‌ ಬಾಸ್‌ ಮನೆ ಪ್ರವೇಶಿಸುವ ಸಾಧ್ಯತೆ ಇದೆ. ಈ ಹಿಂದೆ ಅವರು ಬಿಗ್‌ ಬಾಸ್‌ ಕನ್ನಡದ ನಾಲ್ಕನೇ ಆವೃತ್ತಿಯಲ್ಲಿ ಸ್ಪರ್ಧಿಯಾಗಿ ಭಾಗವಹಿಸಿದ್ದರು. ಅನಾರೋಗ್ಯದ ಕಾರಣ ಏಳನೇ ವಾರದಲ್ಲಿ ಕಾರ್ಯಕ್ರಮದಿಂದ ಹೊರಬಂದಿದ್ದರು.

ಗಗನ್‌ ಚಿನ್ನಪ್ಪ:‘ಸೀತಾ ರಾಮ’, ‘ಕರ್ಣ’, ‘ಪುಟ್ಟ ಗೌರಿ ಮದುವೆ’ ಹಾಗೂ ‘ಮಂಗಳ ಗೌರಿ’ ಧಾರಾವಾಹಿಗಳ ಮೂಲಕ ಜನಪ್ರಿಯರಾಗಿರುವ ಗಗನ್‌ ಚಿನ್ನಪ್ಪ ಅವರ ಹೆಸರು ಕೂಡ ಪಟ್ಟಿಯಲ್ಲಿದೆ. ‘ಅಲೆಗ್ಸಾಂಡರ್‌’ ಸಿನಿಮಾದಲ್ಲಿ ನಾಯಕನಾಗಿ ನಟಿಸಿದ್ದಾರೆ.

ಜಗ್ಗಾ ಮಮ್ಮಿ ಅಲಿಯಾಸ್‌ ಜಗದೀಶ್‌: ‘ಲವ್‌ ಮಾಕ್ಟೇಲ್‌ 3’ ಚಿತ್ರದ ಮೂಲಕ ಗಮನ ಸೆಳೆದಿರುವ ಜಗದೀಶ್‌ ಅವರು ಈ ಬಾರಿ ಬಿಗ್‌ ಬಾಸ್‌ ಸ್ಪರ್ಧಿಯಾಗಲಿದ್ದಾರೆ ಎನ್ನಲಾಗಿದೆ.

ತಾಂಡವ್‌ ರಾಮ್‌: ‘ಜೋಡಿ ಹಕ್ಕಿ’, ‘ಭೂಮಿಗೆ ಬಂದ ಭಗವಂತ’ ಧಾರಾವಾಹಿ ಹಾಗೂ ‘ಅಬ್ಬಬ್ಬ’ ಚಿತ್ರದ ಮೂಲಕ ಗುರುತಿಸಿಕೊಂಡಿರುವ ತಾಂಡವ್‌ ರಾಮ್‌ ಅವರ ಹೆಸರೂ ಕೇಳಿಬರುತ್ತಿದೆ. ನಟನೆಯ ಜತೆಗೆ ನಿರ್ಮಾಣ ಕ್ಷೇತ್ರದಲ್ಲೂ ಅವರು ತೊಡಗಿಸಿಕೊಂಡಿದ್ದಾರೆ.

ಪ್ರಥಮಾ ಪ್ರಸಾದ್‌: ನಟಿ ವಿನಯ್‌ ಪ್ರಸಾದ್‌ ಅವರ ಪುತ್ರಿ ಪ್ರಥಮಾ ಪ್ರಸಾದ್‌ ಕನ್ನಡ ಚಿತ್ರರಂಗ ಹಾಗೂ ಕಿರುತೆರೆಯಲ್ಲಿ ಸಕ್ರಿಯರಾಗಿದ್ದಾರೆ. ‘ಎಂಎಂಸಿಹೆಚ್‌’, ‘ಚೌಕ ಬಾರ’ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಹಾಗೂ ‘ಮಹಾದೇವಿ’, ‘ಬ್ರಹ್ಮಗಂಟು’, ‘ಒಲವಿನ ನಿಲ್ದಾಣ’ ಧಾರಾವಾಹಿಗಳಲ್ಲಿ ಅಭಿನಯಿಸಿದ್ದಾರೆ.

ಸೌಂದರ್ಯ ಶೆಟ್ಟಿ: ಮಂಗಳೂರು ಮೂಲದ ಸೌಂದರ್ಯ ಶೆಟ್ಟಿ ಹೆಸರು ಕೂಡ ಸ್ಪರ್ಧಿಗಳ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿದೆ. 2019ರಲ್ಲಿ ‘ಮಿಸ್‌ ವರ್ಲ್ಡ್‌ ಟೀನ್‌ ಸೂಪರ್‌ ಮಾಡೆಲ್‌’ ಪ್ರಶಸ್ತಿ ಗೆದ್ದಿದ್ದ ಅವರು, ‘ಸ್ಪ್ಲಿಟ್ಸ್‌ವಿಲ್ಲಾ’ ಹಾಗೂ ‘ರೋಡೀಸ್‌’ನಂತಹ ರಿಯಾಲಿಟಿ ಕಾರ್ಯಕ್ರಮಗಳಲ್ಲಿ ಸ್ಪರ್ಧಿಸಿ ಗಮನ ಸೆಳೆದಿದ್ದಾರೆ.

ಯಶಸ್‌ ಕೃಷ್ಣ: ‘ಪವಿತ್ರಾ ಬಂಧನ’ ಧಾರಾವಾಹಿಯ ‘ತಿಲಕ್‌ ದೇಶ್‌ಮುಖ್‌’ ಪಾತ್ರದ ಮೂಲಕ ಜನಪ್ರಿಯರಾಗಿರುವ ಯಶಸ್‌ ಕೃಷ್ಣ ಕೂಡ ದೊಡ್ಮನೆಗೆ ಕಾಲಿಡಲಿದ್ದಾರೆ ಎನ್ನಲಾಗಿದೆ.

ಅವಿನಾಶ್‌ ಶತಮರ್ಷನ್‌: 2018ರಲ್ಲಿ ತೆರೆಕಂಡ ‘ಕನ್ನಡಕ್ಕಾಗಿ ಒಂದನ್ನು ಒತ್ತಿ’ ಸಿನಿಮಾದಲ್ಲಿ ನಾಯಕನಾಗಿ ನಟಿಸಿರುವ ಯುವ ನಟ ಅವಿನಾಶ್‌ ಶತಮರ್ಷನ್‌ ಅವರ ಹೆಸರು ಕೂಡ ಪಟ್ಟಿಯಲ್ಲಿದೆ.

ಡ್ರ್ಯಾಗನ್‌ ಮಂಜು:‘ಭೀಮಾ’ ಸಿನಿಮಾದಲ್ಲಿ ಖಳನಾಯಕನಾಗಿ ಕಾಣಿಸಿಕೊಂಡು ಗಮನ ಸೆಳೆದ ಡ್ರ್ಯಾಗನ್‌ ಮಂಜು, ಬಳಿಕ ‘ಮಾರ್ಕ್‌’, ‘ಬ್ರ್ಯಾಟ್‌’ ಸೇರಿದಂತೆ ಹಲವು ಚಿತ್ರಗಳಲ್ಲಿ ನಟಿಸಿದ್ದಾರೆ. ಅವರ ಹೆಸರೂ ಬಿಗ್‌ ಬಾಸ್‌ ಪಟ್ಟಿಯಲ್ಲಿದೆ.

ಸೂರಜ್‌: ‘ಕಾಮಿಡಿ ಕಿಲಾಡಿಗಳು’ ಕಾರ್ಯಕ್ರಮದ ಮೂಲಕ ಜನಪ್ರಿಯತೆ ಗಳಿಸಿರುವ ಸೂರಜ್‌ ಅವರೂ ಈ ಬಾರಿ ದೊಡ್ಮನೆ ಪ್ರವೇಶಿಸಲಿದ್ದಾರೆ ಎನ್ನಲಾಗಿದೆ.

ರಾಚೆಲ್‌ ಡೇವಿಡ್‌: ‘ಲವ್‌ ಮಾಕ್ಟೇಲ್‌ 2’ ಚಿತ್ರದ ‘ಸಿಹಿ’ ಪಾತ್ರದ ಮೂಲಕ ಕನ್ನಡಿಗರ ಗಮನ ಸೆಳೆದಿರುವ ರಾಚೆಲ್‌ ಡೇವಿಡ್‌ ಅವರ ಹೆಸರೂ ಸ್ಪರ್ಧಿಗಳ ಪಟ್ಟಿಯಲ್ಲಿದೆ.

ರೈತ ಸಂಜೀವ್‌: ಕೋಲಾರ ಮೂಲದ ‘ರೈತ ಸಂಜೀವ್‌’ ಅವರೂ ಸ್ಪರ್ಧಿಯಾಗಲಿದ್ದಾರೆ ಎಂಬ ವರದಿಗಳು ಹರಿದಾಡುತ್ತಿವೆ. ಸಾರ್ವಜನಿಕವಾಗಿ ಕಪ್ಪು ಪಂಚೆ, ಶರ್ಟ್‌ ಹಾಗೂ ಚಿನ್ನಾಭರಣ ಧರಿಸುವ ಮೂಲಕ ಗಮನ ಸೆಳೆದಿರುವ ಅವರನ್ನು ‘ರೈತ ಸಂಜೀವ್‌’ ಅಥವಾ ‘ಗೋಲ್ಡ್‌ ಮೈನ್‌’ ಎಂದೂ ಕರೆಯಲಾಗುತ್ತಿದೆ.

ಸಾಮಾನ್ಯರಿಗೂ ದೊಡ್ಮನೆ ಬಾಗಿಲು

ಈ ಬಾರಿ ಬಿಗ್‌ ಬಾಸ್‌ ಕನ್ನಡದ ಪ್ರಮುಖ ಆಕರ್ಷಣೆ ಸಾಮಾನ್ಯರ ಪ್ರವೇಶ. **ಕಿರಣ್‌ ಶಾಸ್ತ್ರಿ, ಲಿಖಿತ್‌ ಗೊಂಧಿ, ಧನುಷ್‌ ಹಾಗೂ ‘ಮಾರ್ಡನ್‌ ಮಹಾಕವಿ’ ಮಂಜ** ಅವರು ಸಾಮಾನ್ಯರ ವಿಭಾಗದಿಂದ ದೊಡ್ಮನೆ ಪ್ರವೇಶಿಸಲಿದ್ದಾರೆ ಎನ್ನಲಾಗಿದೆ.

ಒಟ್ಟಿನಲ್ಲಿ 13ನೇ ಆವೃತ್ತಿಯಲ್ಲಿ 16ಕ್ಕೂ ಹೆಚ್ಚು ಸ್ಪರ್ಧಿಗಳು ಕಾಣಿಸಿಕೊಳ್ಳುವ ಸಾಧ್ಯತೆ ಇದ್ದು, ಅಂತಿಮವಾಗಿ ಯಾರೆಲ್ಲ ದೊಡ್ಮನೆಗೆ ಪ್ರವೇಶಿಸಲಿದ್ದಾರೆ ಎಂಬ ಕುತೂಹಲಕ್ಕೆ ಇಂದು ಸಂಜೆ ತೆರೆ ಬೀಳಲಿದೆ.